#產前產後 🧘🏻‍♀教你加快產後收身🌟
Please reload

​最新文章

【#產前產後 🧘🏻‍♀教你加快產後修身🌟 】

April 18, 2019

產後瑜伽可以幫助媽媽們增強血液循環,恢復皮膚彈性,消除多餘脂肪,幫妳加快產後修身!除咗修身之外,由於媽媽們喺懷孕期間嘅體形變化同產後抱BB姿勢會傾向長時間將身體重心向前移,有機會引發頸、背、骨盆同腳跟痛等等問題,產後瑜伽可以幫助改善不良姿勢及痛症,亦可以強化因為生產而變得鬆弛嘅腹部同骨盆肌肉,幫助媽媽恢復身體!除此之外,產後做多一啲適當嘅運動同伸展可以幫助媽媽放鬆心情,預防產後情緒問題㗎!

 

由於人人體質唔同,媽媽要根據身體實際嘅恢復情況而決定幾時可以開始做瑜伽,一般順產嘅媽媽可以喺產後6星期開始,而剖腹產嘅媽媽們就要喺6個月後先可以開始以免影響傷口。事不宜遲!Let's get started! ⬇️

 

就由難度一粒星嘅半龜式開始熱熱身,半龜式屬於一個全身放鬆嘅動作,可以好好幫妳伸展下背及臀部肌肉,擴張肺部及脊椎,同時解決消化不良嘅問題。

 

🧘🏻‍♀動作指引🌟

(1)首先彎曲雙腳坐喺腳跟上,雙手放喺膝蓋上,閉上雙眼,全身放鬆

(2)吸氣再將雙手合十高舉過頭,肩膀向後打開

(3)呼氣再將上半身前彎,腹部貼近大腿,胸部貼近膝蓋,將下手臂平放喺地上伸展

(4)將鼻尖、額頭貼地,頭放在雙手之間。維持動作大約5-7個呼吸,再用雙手支撐,慢慢將身體升高回到(1)

 

第二個動作就係眼鏡蛇式,可以重點幫妳鍛鍊腰背,強化臀部、調整腹部、肩膀同手臂!

 

🧘🏻‍♀動作指引🌟

(1)全身平趴喺瑜伽墊上,額頭貼地。將雙手放喺身體兩側,掌心向上

(2)將手掌放喺肩膀下方,手肘向上,肩胛骨內縮互相靠近

(3)吸氣,掌心貼地,用手臂力量撐起頭部、胸部、上腹部

(4)挺胸,雙手伸直,緊記保持腰背挺直。再將下巴微微抬高至45度,維持動作大約5-7個呼吸

同樣係難度2粒星嘅脊椎扭轉式可以促進血液回流到脊椎、背部肌肉、臀部、腹部以及肩膀,有助增強脊椎靈活度,減輕下背部疼痛,同時可以改善便秘問題。

 

🧘🏻‍♀動作指引🌟

(1)坐喺地上並將腰背伸直,雙腿打直合上,將腳尖指向身體方向

(2)右腿彎曲,膝蓋向上,將腳跟貼近左大腿內側,腳掌貼地,右大腿貼近右側腹部

(3)左手抱右腿,慢慢將右腿靠近身體,旋轉腰部將右手放於身體後側,面向右邊,維持動作大約5-7個呼吸。

(4)休息2-3個呼吸再左右換邊,重複以上動作

第四個係產後瑜珈必做動作虎式,可以有效舒緩孕期所造成嘅腰背酸痛,仲可以強化生殖功能,調整腿部、手臂、肩膀肌肉,靈活脊椎及鍛鍊平衡感。

 

🧘🏻‍♀動作指引🌟

(1)首先做一個跪趴動作,腰背挺直,雙膝跪下,手掌心貼地,手臂伸直

(2)將身體重量放喺右手,挺胸,將右腳向後伸直,往上舉起

(3)左手向前伸直並抬高至肩膀位置

(4)保持身體平衡,並持續將右腳向後、左手向前伸展

(5)維持動作大約5-7個呼吸

(6)吐氣放鬆,再左右換邊,重複以上動作

 

最後一個動作將難度升級到三粒星!鷹式可以幫助強化膝頭、手臂同腳踭嘅力量,改善關節穩定度、提高身體平衡力。

 

🧘🏻‍♀動作指引🌟

(1)企直,先將雙膝彎曲,再將手臂兩邊平行抬高,將身體重心移到左腳 

(2)抬起右腳,慢慢將右大腿繞過左大腿前方

(3)如果可以的話,再用右腳背勾左小腿後方。再將左手臂放上,右手臂放下,雙手喺胸口前交叉抱

(4)將右手緩緩升上,手掌向左側。左手掌向外繞,手掌合十,放喺胸前。維持動作大約3-5個呼吸,然後鬆開四肢。休息5個呼吸再左右換邊,重複以上動作

 

💡產後瑜伽好處多多,但各位媽媽們記得要循序漸進,量力而為。開始做瑜珈前先做一啲簡單嘅伸展。如果以上嘅動作需要躺臥,就要喺有防滑功能嘅軟墊上完成。同埋緊記每個人嘅肢體柔軟度、延展性都唔一樣,如果覺得動作太困難就唔好勉強完成,以免跌倒或肌肉拉傷。希望大家多多練習,盡快養好身體,有好嘅體魄可以照顧BB!

 

Share on Facebook
Share on Twitter
Please reload

Follow Us